விரைவில் திரைக்கு வரவுள்ள ஹிட்லர் படத்தின் பத்திரிக்கையாளர் சந்திப்பு படக்குழுவினர் கலந்து கொள்ள, பத்திரிக்கை ஊடகவியலாளர்கள் முன்னிலையில் நடைபெற்றது.
இந்நிகழ்வினில் தயாரிப்பாளர் டிடி ராஜா பேசுகையில், “இந்தப் படத்தில் ஒவ்வொரு தொழில் நுட்பக் கலைஞரும் மிக அர்ப்பணிப்போடு கடினமாக உழைத்துள்ளனர். இசை அமைப்பாளர், ஸ்டன்ட் மாஸ்டர் என ஒவ்வொருவரும் அவர்களின் சிறப்பான உழைப்பைத் தந்துள்ளனர். நடிகை ரியா சுமன் அருமையான நடிப்பை வழங்கியுள்ளார். தனா 24 மணி நேரமும் இந்தப்படத்தையே நினைத்துக் கொண்டிருப்பார். இரவு பகலாக படத்திற்காக உழைத்துள்ளார். விஜய் ஆண்டனி மனிதநேய மிக்க மாமனிதன் அவர். அவரது சொந்தப் படத்தை விட இந்தப் படத்தின் மீது அக்கறை கொண்டு என்னிடம் எப்போதும் விசாரித்துக் கொண்டிருப்பார்,” என்றார்.
இயக்குநர் தனா பேசியதாவது:
“இந்த படத்தில் நன்றி என ஆரம்பித்தால் 500 பேருக்கும் மேல் நன்றி சொல்ல வேண்டும். அத்தனை பேரின் பங்கும் இருக்கிறது. என்னை நம்பி தயாரித்த ராஜா, என் கதையில் நடிக்க வந்த விஜய் ஆண்டனி ஆகியோருக்கு நன்றி. இந்தப் படத்தில் மிகச் சிறந்த நடிகர் பட்டாளம் எனக்குக் கிடைத்தார்கள். அவர்களால்தான் இந்தப்படம் சாத்தியமானது. கௌதம் மேனன், தமிழ், விஜய் ஆண்டனி என எல்லோருமே அர்ப்பணிப்புடன் உழைத்துள்ளனர். இந்தப்படம் முன்பே வந்திருக்க வேண்டியது. விஜய் ஆண்டனிக்கு நடந்த எதிர்பாராத ஆக்ஸிடெண்ட் படத்தைத் தாமதமாகியது. அந்த ஆக்ஸிடெண்ட் நடந்து அவர் எங்களுக்காக விரைவாக எழுந்து வந்தார். அவரது அர்ப்பணிப்பு வியப்பானது. அவருக்கு என்றென்றும் நன்றி. இந்த இடத்தில் என் ஒளிப்பதிவாளர் நவீன்குமாருக்கு நன்றி சொல்லிக் கொள்கிறேன். அவரது உழைப்பு அபாரமானது. படத்தின் இசை விவேக் – மெர்வின். மிக அற்புதமாக வந்துள்ளது. படத்தொகுப்பாளர் சங்கத்தமிழன், மணிரத்னம் படத்திலிருந்தே தெரியும். அவருடன் மிக நட்பாகப் பழகுவேன். எனக்காக இறங்கி வேலை செய்வார். அவருக்கு நன்றி. ரியா சுமனுக்கு பதிலாக முதலில் வேறு ஒரு நாயகிதான் நடிப்பதாக இருந்தது. ஆனால் படத்தின் ஷூட்டிங்கிற்கு இரண்டு நாட்கள் முன்னால் அவரால் நடிக்க முடியவில்லை. அந்த நேரத்தில் எங்களுக்காக வந்தவர் தான் ரியா சுமன், மிகச்சிறந்த நடிகை. ஹிட்லர் எனது முந்தைய படங்களிலிருந்து மாறுபட்ட படம். ஒரு ஆக்சன் திரில்லர் படம். படத்தைப் பார்த்த போது எங்களுக்கு நிறைவாக இருந்தது அதை நீங்களும் உணர்வீர்கள் என்று நம்புகிறேன்.”
நடிகர் விஜய் ஆண்டனி பேசுகையில், “இயக்குநர் தனாவின் வானம் கொட்டட்டும் படத்திற்கு மிகப்பெரிய ரசிகன் நான். நானும் தயாரிப்பாளர் ராஜாவும் யாரை வைத்து அடுத்த படம் எடுக்கலாம் என்றபோது இருவரிடமும் வந்த பெயர் தனா. குறைந்த காலத்தில் ஒரு அழகான படத்தைத் தந்துள்ளார். அவர் இன்னும் உயரம் செல்வார். ரெடின் கிங்ஸ்லி திரையில்ந காமெடியில் அசத்துகிறார். ரியா சுமனுக்கு இவ்வளவு தமிழ் தெரியுமென்பதே தெரியாது. மிகச் சிறந்த நடிகை. டாணாக்காரன் தமிழ், கௌதம் மேனன் இருவருடனும் நடித்தது மகிழ்ச்சி. விவேக் பிரசன்னா நடிப்பு மிகவும் பிடிக்கும் அவருக்கும் வாழ்த்துக்கள். விவேக், மெர்வின் இருவரும் அருமையான இசையைத் தந்துள்ளனர். விபத்துக்குப் பிறகு என்னைப் பூப்போல பார்த்துக்கொண்டார் ஸ்டண்ட் டைரக்டர் முரளி , அவர்களுக்கு நன்றி. ஒளிப்பதிவாளர் நவீன்குமார் என் அடுத்த படத்திற்கும் அவர் தான் கேமராமேன், சிறந்த ஒளிப்பதிவாளர். படத்தில் உழைத்த அனைவருக்கும் என் நன்றிகள். படம் கண்டிப்பாக உங்களுக்குப் பிடிக்கும்”.
இந்த நிகழ்ச்சியில் படத் தொகுப்பாளர் சங்கத் தமிழன், ஆடை வடிவமைப்பாளர் அனிஷா,
ஸ்டண்ட் மாஸ்டர் முரளி, இசையமைப்பாளர் விவேக் – மெர்வின், நடிகர் விவேக் பிரசன்னா, இயக்குநர் – நடிகர் தமிழ், ரெடின் கிங்ஸ்லி, நடிகை ரியா சுமன் ஆகியோருந் நிகழ்ச்சியில் பங்கேற்றுப் பேசினர்.